Nieuwe Tijdinghen/1620/20 november (1)
| ← 13 november 1620 [2] | Verhael van het innemen der Steden in Bohemen, van des Keysers volck, ende den Grave van Bucquoy, den Hertoch van Beyeren, ende den Cheur-Vorst van Saxen
[Nieuwe Tijdinghen], Boekje V, [vrijdag] 20 november 1620 |
Verhael van het innemen der
Steden in Bohemen, van des
Keysers volck, ende den Grave van Bucquoy, den Hertoch van Beyeren, ende den Cheur-Vorst van Saxen.
Overghesedt wt de Hoochduytsche sprake in onse Nederlantsche Tale.
Eerst Ghedruckt den xx. November. 1620.
| Den Hertoch van Beyeren. | Den Hertoch van Saxen. |
_p_1_illustration.jpg)
T’Hantwerpen, By Abraham Verhoeuen, op de Lombaerde Veste inde gulde Sonne.1620.V.
Met Gratie ende Privilegie.
Tijdinghe vvt Bohemen van des vyants Hooft-leger by Gorlits.
Den 23. des sauons is t’volc van zijn Ceurvorstelijcke Ghenade den Hertoch van Saxen met een Regiment, ende duysent Musquettiers, met seven Cornetten Ruyters, ende eenighe stucken Gheschuts op ghetrocken, ende is den 24. ditto smorghens vroech voor Gradiz een sterck Edelmans Huys oft Casteel ghecomen, ligghende op een passagie, ende is op den Middach daer voor ghecomen, heeft terstondt het selvighe sterck met Gheschut doen beschieten, waer ouer die van binnen hebben moeten parlamenteren, soo datse t’selve ouer ghegheven hebben, ende zijnder af ghetrocken sonder gheweer oft yet anders, ende waren onder de hondert Musquettiers.
Naer de veroveringhe van desen ende t’selve wel besedt was van den Hertoch van Saxens volc, zijnse getrocken voor de Sterckte Barut, de welcke hun van ghelijcken oock hebben over ghegheuen, ende zijn veraccordeert, als dat de in ligghende Soldaten in de plaetse wesende zijn wt ghetrocken met sack, ende Pack, ende brandende Lonten, ende daer waren 1000. Musquettiers, ende 500 te peerde tot Wittingauw ghecomen. [ 5 ]
Wt Gorlitz.
Des smorghens was den Generael vande Rebellen met den Grave van Solms, ende den gantschen Legher op ghebroken, om den Hertoch van Saxen eenighe af breuck te doen, ende men werckten sterck aen de Stadt.
Den Hertoch van Saxen heeft de Stadt Sonnewald met Appointement in genomen, soo daer maer 1000. Soldaten te voet waren, ende eenige hondert Ruyteren, ende de stadt qualijck besedt was, daer werden in de stadt ghevonden 18. stucken Gheschuts op hare Affuijten, met andere Provisie.
Men verstaet dat die Stadt Lubau haer ooc met Appointement ouer ghegheven heeft.
VVt Buddiſsin den 5. Nouember 1620.
Den Marckgraef van Jaghendorp is ghisteren morghen vroech met 14. Cornetten Ruyteren, ende elf Vendelen Voet-volck, ende eenighe groote stucken Gheschuts, hier hart by de stadt gheweest, ende hem verthoont met zijn volck op eenen hooghen Berch, by den Gorlitser wech, waer over in alles die Legers een groot Allarm is gheweest, soo dat alles de Ruyterije by een is ghecomen, ende daer was Ordre gegheven, datmen eenen aenval soude doen met 1000. Musquettiers, ende 800. Peerden.
Die van Buddissin zijn terstont met de Hooft Va[ 6 ]nen vande Ruyterije wt ghetrocken, om den vyant te verteghenen, waer ouer den vyandt gheen plaetse en heeft ghevonden, ende is in alder Diligentie te rugghe gheweken.
Den 9. Nouember quam de Tijdinge dat die staten ende die Stadt van Nederlausnits met den Ceur-Vorst van Saxen goetwillich waren veraccordeert, alwaer eenen Landt-dach soude beschreven worden.
VVt Preſlauw in den Sleſien 1. Nouember.
Ende alhier op dese Frontieren zijn ses duysent Cosagghen ghecomen, ende willen naer den Ceur-vorst Hertoch van Saxen trecken tot zijnder Assistentie, hier quam de Tijdinghe datse aen malcanderen geweest hadden in der Walachay, de Polacken teghen de Turcken, ende dat de ses duysent Cosaggen tegen den Turck souden trecken. [ 7 ]
VVt Buddiſsin 29. October.
Den Ceur-Vorst van Saxen heeft eenich Chrijsvolck verdeylt in Steden, voor het Winter, ende de tijdinghe compt wt Lausnits als datter niet meer in het Lant en is dat teghen houdt als Suppen dat hem alles onder zijn Cheurvorstelijcke Genade van Saxen begheven heeft, in de Stadt Luppa zijn 14. stucken Gheschuts ghevonden, ende neghen Centner Poeyer, ende in de Stadt Lubau 8. stucken geschuts.
VVt Eger van 13. Nouember, 1620.
Des Keysers Volck hier ontrendt in den Sazer Creiz, ouer de Massen ouer, smijtent al doot, ionck ende oudt datse crijghen connen, ende hebben den 2. ditto de Stadt Plan met een Casteel vier mijlen van hier alles wt gheplundert, ende daer naer aen de vier hoecken in brant ghesteken, ende tot asschen laten verbranden, alles wat niet wech loopen en coste, wert doot gheslaghen, alsoo ist oock ghebeurt met die van Kuteniblen, ende alles verbrandt, waer van hier oock gheen Dorpen seker en zijn.
Des Sondaechs was hier een groote vluchtinge van Schlackenwald, ende andere plaetsen daer ontrent, van wijf, Kinderen, ende Goederen, Graen ende Beesten, soo dat het niet te schrijven en is, de tijdinghe compt hier dattet een groote desolatie is om sien ouer allen int lant, de doode lichamen diemen in allen [ 8 ]plaetsen vint ende siet ligghen op de velden, ende verstroyt de Huysen, verbrant, ende Kasteelen geruineert waer over den Marckgraeff vermeynt vry te zijn, ouermits den Vorst van den Brandenborch zijne Grentsen sterck besedt, om de Bohemen te helpen.
Van ghelijcken onsen nieuwen Coninck van Bohemen besedt allen plaetsen sterck met Garnisoen, een twee oft dry mijlen hier ontrent, in Steden en Dorpen, als het noot is om t’volck by de werck te hebben, ende desen dach heeft den nieuwen Coninck hier Garnisoen in willen leggen, te weten 250. voetknechten, ende een Compagnie Ruyters, d’welck men heeft af gheslaghen, ende gheweygert, seggende: dies noot zijnde geerne willen doen.
Den nieuwen Ghepretendeerden Coninck is van Rockenzan met den Legher op gebroken, ende des Keysers Legher en leyt maer een halve ure den eenen van den anderen, ende schermutseren somwijlen tegen malcanderen, des Graven van Bucquoy volc heeft Plan afghebrant in Bohemen.
FINIS.