Nieuwe Tijdinghen/1621/nummer 7
| ← Nummer 6 | Postillioen vvtghesonden om te soecken den veriaegden Coninck van Praghe
[Nieuwe Tijdinghen], Nummer 7, [maandag] 18 januari 1621 |
Nummer 8 → |
POSTILLIOEN
VVtghesonden
Om te soecken den veriaegden Coninck van Praghe.
Eerst ghedruckt den 18. Januarius. 1621.
T’Hantwerpen, By Abraham Verhoeven, op de Lombaerde veste, inde gulde Sonne.Met Gratie ende Privilegie.
_p_3_ornament.jpg)
POSTILLIOEN
VVtghesonden om te soecken den veriaegden Coninck van Praghe, 1621.
ICk moet alomme gaen loopen soecken
In alle canten in alle hoecken:
Den Beemschen Coninck, wiens volck voor Praghen,
Onlancx deerlijck is verslaghen,
Die heeft sonder vele gherucht
Ghenomen heymelijck de vlucht,
Seght eens hebdy niet ghesien
Den verloren Palatin? [ 4 ]
Ghy Soldaeten die ghinckt loopen,
Hier, ende daer met groote hoopen,
Om t’ontcomen het dangier,
Van het Keysers volcks rappier,
Ghy light verstopt aen eenen cant
Oft zijt ghevloden wt het Lant:
Seght eens hebdy niet ghesien,
Den verloren Palatin?
Hoort ghy Borgers oock van Praghen
Antwoort eens op mijnder vraghen
Onder t’cryschvolck datmen sach,
T’uwaerts vlieghen naer den slach:
D’een die spronck hier ouer t’boort,
D’ander die is daer versmoort.
Seght eens hebdy niet ghesien,
Den verloren Palatin?
Seght oock eens ghy arme boeren,
Die u qualijck oock derft roeren,
Slaept in Bosschen, in Speloncken,
In Cavernen holle troncken:
Soud’hy niet zijn comen schuylen,
By u inde doncker cuylen.
Seght eens hebdy niet ghesien,
Den verloren Palatin?
Bethlem Gabor die in als,
Compaignon zijt vanden Pals, [ 5 ]
Ick meyne dat ghy hebt verstaen
Hoet met hem is al vergaen:
Hebdy van hem niet vernomen,
Is hy tot u niet ghecomen.
Seght eens hebdy niet ghesien,
Den verloren Palatin?
En ghy duytsche Protestanten,
Die opt hooft hem wilde planten:
Die Croone van het Beemsche rijck,
Teghen reghel ende practijck,
Heeft hy u niet comen claeghen,
Hoe hy is ghecrauwt voor Praghen.
Seght eens hebdy niet ghesien,
Den verloren Palatin?
Ghylieden om wiens raet,
Hy aenveerde dien staet:
Meynde dat u Ruyterijen,
Hem van alles souden bevrijen,
Hebdy noch gheene nieuwe maeren,
Waer hy mach ween vervaeren?
Seght eens hebdy niet ghesien,
Den verloren Palatin?
Cooplie die versch comt van Londen,
Hebdy hem daer niet ghevonden,
Heeft den Coninck gheen verlanghen,
Om aldaer weder t’ontfanghen, [ 6 ]
Onsen nieuwen verloren Sone,
Ballinck vande Beemsche Croone.
Seght eens hebdy niet ghesien,
Den verloren Palatin?
Alle de gheene die hebt te doen,
By den Hertoghe van Bulloen,
Oft aldaer zijt ghepasseert,
Hebdy niet gherencontreert,
Een Jonck man met vrouwe en kint,
Die niet seer wel en was ghesint.
Seght eens hebdy niet ghesien,
Den verloren Palatin?
Ghy Hans-ende Rijck-steden seydt,
Hebdy ghy hem wech gheleydt,
Tot dat hy het gheleende gelt,
U wederomme heeft ghetelt:
Want daer fortuyne is door ghegaen,
Daer is die vrientschap al ghedaen.
Seght eens hebdy niet ghesien
den verloren Palatin?
Pelegrims die d’weers door het Lant,
Met u Palsters inde hant,
Hier en daer compt te verkeeren,
Schuylt hy niet onder u cleeren,
Hebdy nerghens onderweghen,
Eenen compaignon ghecreghen. [ 7 ]
Seght eens hebdy niet ghesien,
Den verloren Palatin?
En ghy nieuwe Hooch-duytsche Joden,
Is hy by u niet ghevloden,
Om te manghelen zijn habijt,
Om daer deur te zijn bevrijt,
Ende niet te zijn bekent,
Van het Crijsch-volck daer ontrent.
seght eens hebdy niet ghesien,
den verloren Palatin?
Ghy Calvinische Predicanten
En ghy Heydelberchsche quanten,
Houdt ghy hem oock niet verborghen,
Om te roepen heden oft morghen,
Op derthiendach alsmen singht,
Coninck Lappeken die drinckt.
seght eens hebdy niet ghesien,
den verloren Palatin?
Ghy mans, Huysmeesters altemael
En Rectoors van het Hospitael,
Is tot u niemant ghekomen,
Die zijn goet was afghenomen,
Hebdy ghy niemant by der hant,
Die veriaecht is wt zijn lant.
seght eens hebdy niet ghesien,
den verloren Palatin? [ 8 ]
Sergianten ende andere gasten,
die veel Vremdelingen aentasten:
Hebdy ghy nerghens een ontmoet,
die gheen bant hadde om den hoet,
Zijne caussen hielen niet met allen,
den Caussebant was afghevallen.
seght eens hebdy niet ghesien,
den verloren Palatin?
Ick ben moede van soo te soecken,
Hoort ghy al die schuylt in hoecken,
Ghy en derft niet comen voor den dach,
Seght waer toch hy wesen mach:
Condy my hem erghens toonen,
Bucquoy salt u rijckelijck loonen.
seght eens hebdy niet ghesien,
Den verloren palatin.
FINIS.