[127]
legghen, tot een versekerde ende ontwijsselicke verderffenisse van alle de landen van herwaerts over: ofte andersins het mochte soo comen, dat de ghene die niet goet en vonden, dat men alsoo nae de ghewoonlicke maniere meer soude branden ende blaecken, gheen gebreck en souden hebben van een hooft ofte voorstaender die sulcks soude willen beletten. Ende hoe wel dat wy met veel redenen hen verthoonden, datse hen souden willen voeghen nae ons advijs ende meyninghe, jae dat wy boven de goede vriendtschap die wy onder malcanderen hadden, hen daer toe noch voorhielden t'advijs van mijn Heere den Grave van Swartzburgh ensen schoonbroeder ende van den Heere Joris van Holt, de welcke doe ter tijdt by den Heeren van herwaerts-over in grooter achtinghe ende wel ghesien waren, om de groote diensten by hen desen landen bewesen: Nochtans het en was doe niet in ons vermoghen t'selve te verwerven: ende dese onse t'samencomminghe en diende nerghens anders toe, dan tot een ghetuyghenis voor alle de weerelt, dat wy siende van verre aencommen t'gene dat wy nu, daghelicks zijn ervarende, alle goede middelen ghesocht hebben om t'selve te voorcomen ende af te keeren. Maer de ghene daer wy te
