[ 136 ]
den selven bewesen, daer toe in aensieninghe van haer edel afcomen, soude veel liever uit haren monde, dan van de Spaegniaerts willen vernemen t'ghene dat tot de bewaringhe van dese landen nootsakelick te doen was: ende siende hoe dat de selve aldaer soo wel ontfanghen worden, als eenen yeghelick notoyr is, dat wy ghedochten goede oorsake vercregen te hebben, om wat naerder op ons selven te letten, ende onsen persoon beter waer te nemen: Haddense (segghen wy) op soodanighe wijse ghesproken, soo soudense eenen deel van de rechte waerheyr geseyt hebben. Want wel een jaer daer te vooren hadden wy gantschelick voor ons ghenomen te vertrecken ende alle onse staten te verlaten, soo 't blijcke by den brief met s'Conincx eyghen handt aen ons gheschreven, hier achter aen gedruckt. Waer uit men can ghenoech bemercken, hoe onwaerachtich dat het ghene is dat hier verhaelt wert. Ende soo yemandt begheert te weten, uit wat oorsaken dat wy nae Duytschlandt een jaer daer naer zijn vertrocken, die mach lesen onse verantwoordinghe int jaer 1567 uitgegaen, de welcke ghenoech te kennen gheeft de redenen van ons vertreck, ende voornemelick dese, om dat wy niet en wouden ghedooghen dat de Spaeni-
