[ 139 ]
gheen middel en saghen om de selve van sodanighe ellendicheyt te verlichten, wy hielden ons vredelick ende stille.
Ende om datse in desen Ban willen segghen, dat gheduyrende de laetste vrede-handelinghe tot Coelen ons van t'selve soude presentatie ghedaen zijn gheweest, dat wy ons souden willen vertrecken ter plaetse van onser gheboorte: Soo moeten se wel weten, datse hen doe wel hadden moghen te vreden houden met ons ghewilligh ballinckschap, sonder ons voorder te vervolghen: selfs gemerckt dat wy hen hadden doen weten by sekeren perfoon van qualiteyt die noch by leven is, waer't datse bestonden ons aen onse eere ofte goeden aen te tasten, datse ons daer door souden bedwinghen nae ons vermoghen sulck ordre in onse saken te stellen, als de noodt soude vereysschen. Maer als verwoede ende rasende luyden, nae datse ons niet en hebben connen aenlocken met soeten ende smeeckachtigen woorden (alsoo de Coninck selve ons meynde te trecken door sekeren brief met eyghener handt aen ons gheschreven, die veel te courtoys was ende te vriendelick, ende dien wy claerlick ghenoech bemerckten vol bedrochs te wesen) soo gaen se hen alvooren adresseren aen onsen sone een kindt dat noch ter scholen
