[ 160 ]
landt ende Zeelandt, door de Staten van de voorschreven landen ende onse regeeringhe is aengherecht ende uitghevoert worden. D'ander is van t'ghene dat daer ghebeurt is nae dien tijdt dat Godt ulieden de ooghen heeft, open ghedaen door 't middel van de onverdraghelicke moetwellicheyt der Spaegniaerden, ende nae dat ghy (om dit arme landt van dit vervloeckt ghespuys eyndelick te verlossen) de selve metgaders hare aenhangers voor rebellen ende des lants vyanden hebt verclaert. Derhalven soo willen wy oock de selve ordeninghe volghen. Ende in den eersten wy dancken Godt dat selve door onses vyandes stilswijgen ghylieden ghenoech moecht bekennen, mijne Heeren, hopende dat het insghelijcks noch de gantsche werelt sal kennelick werden, hoe dat men selfs gheen achterdencken van ons en heeft, als dat wy souden eene de gheringhste mijte uit de ghemeene penninghen tot onsen profijte toegheeyghent hebben. Want naedemael dat sy in anderen dinghen (alsoo ghy eenseels alreede ghesien hebt) gheen swaricheydt en hebben ghemaeckt van ons valschelick te beschuldighen ende soo openbaerlick met der onwaerheyr te lasteren, ghemerckt nu datse ons oock met de minste suspitie van giericheyt niet betijcht en hebben: So bewijsense daer
