[ 163 ]
Soo en hebben wy sulcks niet willen also voorby gaen sonder daer aen te vermanen, om eenighe cleyne vergifte serpenten, die onder ons gheweest zijn, daer door te beschamen, die hen niet en hebben gheschuwt, 't zy teghen haer eyghen conscientie, ofte door een uitnemelicke dwaesheyt ende ergheyt, onder den gemeenen man te stroyen, t'ghene dat des vaderlandts ende onse ghesworen vyanden selve, hen geschaemt hebben ons te verwijten: wel bevroedende, so sy t'selve deden, dat den schijn ende luyster der waerheyt haere leelicke ende schandelicke loghenen haest soude ontdecken.
Dewijle dan datse ons soo schoone ende wijdloopende materie hebben voorgheleyt, om te vertellen niet t'gene dat wy selve, maer dat de Staten van Hollandt ende Zeelandt met onse hulpe ende dienst ghedaen hebben: Soo en weygheren wy niet, noch voor ulieden, mijn Heeren, noch voor alle menschen van der weerelt tot haer lieder instantie daer van rekenschap te gheven. Maer nademael oock, dat ghylieden de opperste ende souvereyne richters zijt van t'ghene dat in dese landen gheschiet is: het is meer dan redene, dat ghy insghelicx aenschouwt ende acht neemt op t'ghene dat by hen lieden in
