[ 165 ]
lick des Hertoghen van Alve te comen bevrijden.
Ende aengaende de beloften by ons ghedaen, doe wy in Hollant quamen, t'ghene datse segghen, dat wy den Staten ghesworen hebben hen alleenelick by te staen ende te beschermen, soo verre de Hertoghe van Alva de selve soude willen fortseren ende bedwinghen tot den thienden ende twintichsten penninghen van den impositien: dat en sal met waerheyt alsoo niet bevonden werden: maer wel is waer, dat wy daerom expresselick ten anderen male binnen s'landts met ghewapender handt zijn ghecomen, om t'landt te verlossen van de tyrannije daer 't alreede meede verdruckt was, niet alleene, met de impositie van den thienden penninck, maer met duysent andere soorten van barbarische wreetheyt, selfs om de groote moorderije ende bloetstortinghe die den Hertoghe van Alva tegen de arme ingesetene van de voorschreven landen was ghebruyckende.
Datse voorts willen segghen, Dat de Gheestelicke persoonen door ons zijn vervolcht worden, ende verjaecht van haren goederen, ende de Religie inghebrocht: Wy en behoeven daer toe gheen ander antwoorde, mijne Heeren, dan t'ghene dat ulieden dies aengaende beter bekend is: te weten, dat alle
