[ 167 ]
deren eedt van den Paus hadden, den welcken sy hoogher achteden dan den genen dien sy aen haer vaderlandt hadden: In der voeghen dat in de vergaderinghe van de Staten binnen Leyden gheschiet, ende daer naer in de vereeninghe ende verbintenisse der landen van Hollandt ende Zeelandt te samen, desen artijckel eendrachtich is verwillighet worden: (D'welck den vyanden selve niet en can soo onbekent zijn, ghemerckt dat ten tijde van de Vrede-handelinghe tot Breda, als belanghende poinct van de Religie, de vyanden der selven by brachten, dat dese veranderinghe door het toedoen ende aenvoeren van sommige particuliere persoonen soude byghecomen zijn, hen wert daer en tegen t'accoordt ende verwillinge van alle, de steden met den segel der selven gewesen:) Hoe connen wy dan noch aen yemandt eenichsins verbonden blijven, als de ghene den welcken wy een belofte ghedaen hebben, niet alleene ons van de selve quijtschelden, maer sy selve die oncrachtich maken, wechnemen ende te niete doen? Dies niet te min willen wy gheerne verstandighe luyden van dese sake laten oordelen, namelick of wy wel ofte qualick daer aen hebben ghedaen. Soo veel isser af, doe sulcks eerst voorghehouden ende verthoont ward,
