[ 184 ]
schuldt ghenoech te kennen ghegheven: ghemerckt dat ghy lieden tot sulcke een handelinghe ende accoort noyt en soudt hebben willen noch behooren te comen, waert dat ghy ons voor sulcks ghehouden hadt, als ons dese eerloose verbanninghe is beschrijvende. Ende naderhant heeft t'selve ghenoech ghebleken by soo veel eerlicke ende sftatelicke Ambassaden aen ons gesonden binnen Geertruydenberghe, oock na dat wy alreede tot Antwerpen aenghecomen waren, soo wel op dat wy ons na Brabande souden willen begheven, als om te versoecken dat wy souden naerder by ulieden tot Brussel toecomen, om aldaer in den Raedt mede te assisteren: ende uit dien dat ghy noch boven dien ons hebt willen vereeren met den tittel van Lieutenant generael. Uit welcken dinghen allen men heeft ghenoech connen sien ende afnemen, wat uwen sin ende gevoelen doe ter tijdt geweest zy van alle dese valsche ende ydele beschuldinghen: het welcke alleene wy achten ghenoechsaem te wesen om de selve te wederlegghen.
Maer laet ons nu daer en teghen sien, hoe dat sy hen voor den selven tijdt over haer lider zijde hebben ghedraghen, met wat grooter opgheblasenheyt ende stoutheyt, oock met wat dertelheyt ende verachtinghe van
