[ 191 ]
dien hy ulieden ghedaen hadde, dat ghy insghelijcken oock quijte ende ontslaghen waert van den eedt dien ghy hem daer teghen hade ghedaen: In der voeghen dat ghy hem ghehoorsaemheyt noch onderdanicheyt meer schuldich en waert? Ende aengaende de voorschreven dispensatie, wy willen andere die in sulcken questie beter gheoeffent zijn dan wij, daer van laten disputeren, of de Paus hem met goeden rechte beroemen mach sodanighe macht ende authoriteyt te hebben: ende of daer oock yet ter weerelt meer sal moghen voor vaste ende versekert gehouden werden, wanneer dat den eedt, met sulcke solenniteyt gedaen, onder soodanigen schijn ofte decksel mach ghevioleert ende ghebroken werden? Ter selver tijdt worden de houwelicken buyten s'landts te doen, heel ende al verboden. Ende t'ghene dat noyt meer ghehoort noch ghesien en was, werdt oock verboden, namelick dat de kinders buyten sijne erflanden nergens en mochten ter scholen gaen, ofte in eenighe Universiteyten verkeeren, uitghesteken alleenelick te Roome: verwerpende, ende condemnerende door soodanich middel alle ander scholen van der weerelt, d'welck een al te over groo-
