[ 196 ]
in der nacht om den hals te doen brenghen, daerom datse hen teghen dese impositie ghestelt hadden, die hy met gewelde teghen hare privilegien hadde laten publiceren. Want meester Karel den Beul hadde last seventhien coorden gereet te houden ende leederen van thien ofte twelf voeten lanck: de soldaten stonden alle in wapenen ende Don Frederico was ghecomen ten huyse van den President Viglius, om het dictum van haer vonnis te besluyten ende arresteren, als dese gheluckighe tijdinghen voor de goede borghers van Brussel quamen. De Lieutenant van den Amman was een daer onder, om dat hy gheweygert hadde te doen executeren de ghene die hen teghen de voorschreven impositie stelden: den welcken de Hertoghe van Alva ghesint was sijn ghelofte te houden, alsoo by corts daer te vooren teghen hem gheseyt hadde Por estas; grijpende by der handt sijnen baert, Si vos no lo hazeis, yo os hazé a horcar; metgaders op de replicke van den voorschreven Lieutenant, segghende: Los Iueses son vellacos: basta que yo os lo mando. Dat is soo veel te segghen: Ick sweere u by desen baert, soo ghy 't niet en doet, dat ick u sal doen hanghen. Item de Wethouders zijn alle rabauwen, ist niet ghe-
