[ 197 ]
noech dat ick 't gebiede? Ende soo veele als onsen persoon is belanghende, wy bekennen dat wy even ter selven tijdt, zijnde anderwerf aenghesocht ende ghesolliciteert soo wel by diversche luyden van eeren, als uit cracht van onsen eyghenen eedt ende schuldt daer wy den lande mede verplicht waren, in 't lant zijn voor de tweede reyse met ghewapender hant gecomen: van welcken krijchs-tocht wy alhier gheen breeder vermaen en willen doen, aenghesien dat niemanden onder ulieden onbekent, is wat een vruchtbaer eynde dat den selven ghenomen heeft, ende wat bate hy ons noch teghen woordelick is medebrenghende.
Soo ulieden dan belieft, mijne Heeren, over d'een zijde te bemercken ende acht te nemen wat de Hertoghe van Alva voor den beginne deser oorloghe ghedaen heeft, hoe gerechte oorsaken ende groote occasien dat hy ons ende den Staten van Hollandt ende Zeelandt ghegeven heeft, de toevlucht tot de wapenen te nemen, d'welck hy ende den grooten Commendador doorgaens vervolcht hebben te doen, tot op dien dach dat de Spaegniaerden gherevolteert ende gherebelleert zijn, oock hoe dat wy ons ter selven tijdt daer en teghen ghedraghen ende de saken beleyt hebben: wy en weygheren niet
