[ 198 ]
de kennisse van dien ulieden over te stellen, om daer van te oordeelen ende te sluyten, alsoo ghy sult bevinden te behooren: Maer t'selve hebt ghy nu alreede ghedaen ende uwe meyninge ghenoech verclaert soo wel door de Pacificatie van Gent, als door t verdrijven van Don Jan, ende veel ander daden ende getuygenissen meer, selfs door dien dat ghy ons van den last dien wy draghen noyt en hebt willen ontslaen, hoe wel nochtans dat wy t'selve tot diversche reysen aen ulieden versocht hebben: soo dat het niet van noode en schijnt voorder bewijs des selven te begheeren. Derhalven soo willen wy nu comen tot tghene dat se in den tweeden deele van dese hare wreede Proscriptie zijn verhalende ende namelick tot t'ghene dat daer is ghevolcht na dien tijdt dat de Spaegniaerts zijn voor rebellen ende vyanden des landes verclaert worden.
Eerstelic, mijne Heeren, op de selve tijt wert de Pacificatie van Gent ghehandelt ende besloten met soo grooter blijschap ende vernoeginghe des volcx van alle de provintien in 't ghemeyne ende van elcke in 't besondere, dar by mans gedencken dies ghelijcke niet en is ghehoort worden. Een yegelic can noch wel indachtich zijn, hoe
