[ 200 ]
tot het besluyten der selven sy benoodicht ende bedwonghen hadden. Maer dewijle datse ons in desen afgrijselicken Ban metgaders in hare cleyne ende ongheschickte smaetschriften, fameuse boecxkens ende secrete brieven die se malcanderen oversenden,soo menichmael voorhouden ende verwijten, dat wy de voorschreven pacificatie belet, ghebroken, ghevioleert ende ons daer teghen gheopposeert hebben. Soo laet ons sien, hoe datse over haer zijde de selve hebben onderhouden. Also saene als de selve ghesworen was, de Heere van Haussy volghende ulieden bevel, dede verscheyden reysen tot ons, in Zeelant zijnde, om bysftant ende secours soo wel van krijchsvolcke als van munitie van oorloghe te verwerven, om t'casteel van Ghent te belegghen, als een van de nesten der Spaensche tyrannije wesende: d'welck hy oock vercreech. Maer eenen quidam, niet weerdich den name te draghen van den huyse daer hy af ghecomen is en conde hem selven niet langher onthouden, maer begonste even te dier tijdt zijn vergift uit te spouwen, lasterende om 't selve grootelicx den voorschreven Heere, in stede van recompense van so goet eenen dienst, door den welcken de dore is geopent worden tot de vryheyt des landts ende
