[ 203 ]
kennelick was: niet te min haren haet ende ouden grol teghen dit arm ghemeyne volck ghevaet was so groot, ende soo diepe ingewortelt, daer toe sy waren soo gewoone den ghenen bystant te doen, die uwe privilegien onderdruckten, jae de dienstbaerheyt diese der tyrannije waren bewijsende, hadde by hen sulcke plaetse gegrepen, als haddense hem van naturen aengheboren gheweest, in der voegen datse als wilde swijnen schuymende van quaetheyt, selve quamen in den spriet van Don Jans bloetgierich herte geloopen: ende maeckten een accoort met hem, contrarie onse advijse, oock van die van Hollandt ende Zeelandt, ja teghen haren eedt dien sy in de Pacificatie ghedaen hadden. Ende dit zijn de gene die ons de Pacificatie ende onsen eedt derven voorhouden, recht al of dese banden nergens anders toe en hadden bereyt gheweest, dan om ons metgaders mijne Heeren van Hollandt ende Zeelandt daer in verstrickt ende geboeyt te houden, middeler tijt dat dese goede ende getrouwe vredehandelaers, die alle verbintenisse van rechten ende van ghetrouwicheyt ghebroken hadden, veroorloft ware te doen ende te bedrijven alle t'ghene dat hen haer trouweloos herte was inghevende.
