[ 204 ]
Sy sullen moghelick by brenghen, datse Don Jan hebben doen beloven, dat hy de Spaegniaerts soude doen vertrecken: recht of ons gantsche verbondt ende vereeninge op dit poinct alleene stonde. Maer en behoordense niet eer dan se t'accoort met Don Jan besloten, ons wederom ghestelt te hebben in onse gouvernementen, ende in 't besit van onse goeden, metgaders ons doen wederom hebben onsen sone, die onder t'getal van de ghevangene was? Ofte hebbense oock slechts eens aen hem ghedocht, hoe wel dat veele onder henlieden van zijn maegschap waren? Niet met allen. Want haer intentie ende voornemen, was wel anders: d'welck sy claerlick bethoont hebben door dien datse soo menigen raedtslach ghehouden hebben, hoe datse mochten eenich middel vinden om ons te onderdrucken, metgaders om Hollandt ende Zeelandt onder hare subjectie te brenghen, dewijle datse bemercken, dat wy ter selver tijdt, metgaders de Staten der voorschreven landen noch alleene de ghene waren, die haren schadelicken aenslach, streckende tot onse grondelicke verderffenisse, met opentlicke macht ende ghewelt te rugge hielden ende verhinderden: de welcke was, datse henlieden selven in de plaetse van de Spaegniaerts
