[ 215 ]
linghen hielden ende ghevoelden. Soo laten wy ulieden nu oordeelen, mijne Heeren, hoe wijselick dat sodanige luyden hare saken overleyt ende bedacht hebben, die niet en conden bevroeden, datse door 't middel van de oorloghe die se teghen ons zijn voerende, de sweerden scherpen van de ghene die zy selve hadden ghevanghen ghenomen, om hen daer mede tot sijner tijt dat hooft voor den voeten te doen legghen.
Hier op sullen se segghen, dat wy ons niet en hebben als vyanden ghestelt tegen de ghene die over onse zijde buyten de mate gheschreden hadden: Voorwaer wy en hebben de fauten ende mishandelinghen van sommighe niet voor goet ghehouden. Maer achten zy ons oock wel soo onvoorsichtich, dat wy om hen een welghevallen te doen, souden de dore gaen openen tot de gheheele verderffenisse des lants, ende Escovedo tot eenen Prophete maken? Of hebben sy oyt meer ghehoort, dat een wijse Vader om sijnen vyande te vrede te stellen, de verdervinghe ende vernielinge van sijn eyghen kinders soude gesocht hebben: ende niet veel meer ter contrarien, dat hy hare fauten behoort te straffen ende die verbeterende, niet temin sijn huysghesin voor te staen ende te bewaren? Maer Bours, Mon-
