[ 218 ]
niet en vallen, ende nochtans vol zijn van alle onghestadicheyt ende lichtveerdicheyt: soo men wil alleenelick bemercken t'ghene dat eenen yegelick notoyr ende kennelick is, ja dat de gheheele werelt sien ende tasten can: wie sal hem connen ghenoech verwonderen van de onsekerheyt, onstantvasticheyt ende ydelheyt van hare resolutie ende voornemen? Sy dienen eerstelick den Hertoge van Alva ende den grooten Commendador als oft sy hare ghehuyrde knechten waren. Sy voeren den krijch teghen ons met aller strengicheyt ende een weynich tijts daer naer sy comen met ons van den vrede te handelen. Soo versoenen sy hen dan met ons: ende siet, nu zijnse vyanden van de Spaegniaerts gheworden. Don Jan comt daer naer in 't landt: ende sy volghen hem, se dienen hem, se ghedencken aen alle middelen om ons in den grondt te bederven. Don Jans aenslach en gheluckt hem niet, dien hy voor hadde van 't Casteel van Antwerpen in te nemen: soo verlaten se hem oock, ende senden om ons te beroepen dat wy souden met den eersten overcomen. Wy en hebben noch soo sane den voet in 't landt niet, soo gaen sy teghen haren eet, sonder yet met ulieden, mijne Heeren ofte met ons daer van te communiceren,
