[ 220 ]
souden sy doch leelicker ofte schandelicker hebben connen doen dan datse tot dese moedeloose ende bloohertighe verbanninghe haren wille hebben overghegheven, door de welcke den selven na sijn lijf ende leven wert ghestelt, die hen lieden haer leven heeft behouden, ende den voorneemsten onder hen haer goet heeft doen weder gheven? Ende weest versekert, mijne Heeren, dat het daer mede noch niet al ghedaen en is: want soo sy (als wy hen wel souden wenschen) hare faute niet en comen te bekennen ende hen die niet en laten leedt zijn, ghy sult se noch meer dan thien reysen van sadel en peerdt sien veranderen, eer dat dese saken een eynde crijghen.
Belanghende t'ghene datse ons voorhouden, dat wy ons souden met ghewelt ende oproer van de ghemeynte, teghen den wille van den Staten, hebben doen verclaren voor Ruwaert ende schermheer van Brabandt. Ghy sult noch wel indachtich zijn, mijne Heeren, dat wy ulieden noyt gheen woordt daer van ghesproken, noch eenichsins t'selve by ulieden versocht ofte daerom aenghehouden hebben maer wel ter contrarien, dat wy grooten wederstandt ende weygheringhen daer teghen deden. Selfs aengaende van 't Lieutenantschap generael, eer wy dat wou-
