[ 221 ]
den aenveerden, wy hebben alvooren begheert t'advijs ende de verwilliginghe van de hoofden die in onse legher waren, de welcke seer onlancx daer naer wert in de vlucht ghedaghen (wy en willen nu niet segghen door wiens faute t'selve is by ghecomen) ende sy sonden ons t'voorschreven advijs over, met haer eyghen handt gheteeckent, d'welck noch onder ons is berustende. Soo nu daer, en boven sommighe uit den ghemeynen volcke dese verkiesinghe voort stierden ende seer ernstlick aendreven, hoe wel dat wy om 't selve te doen noyt niemandes ghebeden noch aenghesocht hadden nochtans wy moeten wel bekennen, datse in den saken van dese landen doe ter tijdt veel wijser ende voorsienigher waren dan wy selve. Want se wisten wel van te vooren ende saghen 't voor ooghen, hoe datse latende alle de handelinghe ende administratie van de ghemeyne sake in de handen van dese ghespaegnoliseerde luyden, eyndelick souden bevinden, datse op een seer licht ende onvaste sandt soodanich een ghebou souden ghetimmert hebben.
Even soo waerachtich is t'gene datse daer by hangen, dat wy insghelijcks door oproerende emotie van die van Gendt ons hebben laten kiesen Gouverneur van Vlaenderen: t'welcke comt uit een enckel onwetenheyt.
