[ 224 ]
ter doot brenghen, wy en houden niet dat het noodich zy yet te antwoorden voor ulieden, mijne Heeren, die selve wel weet, dat sulcks versiert ende onwaerachtich is Jae ghy weet daer en teghen, dat wy veel meer beschuldicht ende ghelastert zijn gheweest, van weghen onser over-groote sachtsinnicheyt ende lijdtsaemheyt, om dat wy menighe snoode gheesten verdreghen hebben, die onse saken door hare consten ende practijcken metgaders hare heymelicke raedtslaghen waren verachterende, dan dat wy van onsen vyant van rouwicheyt ende stuerheyt beschuldicht werden. Ende ware t'ghene datse ons hier voor werpen waerachtich, vele zijn daer die huydensdaechs veel claps hebben ende luyde tieren, den welcken men haer snateren wel soude benomen hebben. Dies niet te min, soo en ist ons noch niet berouwen dat wy alsoo met hen gheleeft hebben: ende sullen ons altijts verblijden van dat wy liever hebben ghehadt, dat ons soude onghelijck gheschieden, dan dat wy t'anderen souden begheert hebben te doen: gheensins daer aen twijfelende, of God die een rechtveerdich rechter is, en sal noch eens dese verraders ende onghetrouwe luyden, die 't broot met ons waren, etende metgaders mede deelachtich van onse raedtslaghen, doch t'sel-
