[ 227 ]
hadde, dat wy hadden de macht ghehadt sulcx te doen, ofte dat wy door het overhaesten van sommighe, niet en hadde belet gheweest sodanighe veranderinghe over al aen te richten. Want daer en soude soo overvloedich quaet niet uit ghevolcht zijn als men heeft gesien ter causen van de scheydinghe der provintien van den anderen: ende is te besorgen dat het niet daghelicx meer ende meer toeneme tot des landts alghemeyne verderssenisse. Wy hopen ymmers ten alderminsten, soo verre als de voorschreven provintien, die ons so schandelick verlaten hebben, hen de selve faute ende mishandelinghe niet en laten berouwen, datse eyndelick sullen ghevoelen, dat niemant om eenen snooden raedt soo swaerlick ghestraft en wert, als even de ghene die den selven eerst ghegheven hebben. Ende alhier en willen wy gheen groote moeyte doen om op dese versierde ende valsche beschuldinghe te antwoorden, dat wy in plaetse van de voorschreven officiers anderen extraordinaerlick ghestelt hebben door onse eyghen authoriteyt: ghemerckt dat over al daer wy by gheweest hebben by 't vernieuwen van de Wetten, wy alleenelick ghedaen hebben ende te wercke ghestelt sulcken last ende bevel als ulieden belieft heeft ons te gheven, ende
