[ 228 ]
als een van uwe ghecommitteerde ofte ghedeputeerde, in 't selve niet doende teghen de rechten ende privilegien alsoo wy hier beschuldicht werden. Maer dat willen wy gheerne bekennen, dat wy ten besten dat ons heeft moghelick gheweest, altijdt gesocht hebben eerlicke ende deuchdelicke luyden, van goeder conscientie, ende boven al liefhebbers des vaderlants daer in te brenghen. Maer wy weten wel waer dat het hen lieght, ende waerom datse hen so seere becommeren, namelick, om dat wy niet gheerne mede hebben voorgetrocken ende ghefavoriseert de ghene diese aen haer snoercken hadden hanghende, luyden sonder trouwe, ende die gheen barmherticheyt noch medelijden tot haer eygen vaderlandt en hebben, jae bloet-dorstige luyden ende die slaven zijn van hare tyrannije. Ende dit is t'ghene dat se noemen een tyrannische Barbarische en de moortdadighe confusie, namelick, dat wy onse ghemeynte hebben willen reguleren nae onse rechten, de welcke van haren barbarischen voornemen ende intentien also verscheyden zijn, als den dach is van der nacht. Ja wat is het van noode, mijne Heeren, op soodanich voorhouden hen te antwoorden, dewijle dat onse vyande selve genoech daer op antwoordet? Want wat waren de offi-
