[ 231 ]
tuerlicken verstande berooft zijn, ende hoe dat, als se ons meynen meest te straffen ende te schelden, sy ons als dan aldermeest loven ende prijsen. Het is waer, dat se onder hen vijf of ses onbedachte hoofden, vyanden van uwe vryheyt (der welcker raetslaghen, sinnen ende heymelicke ghepeynsen alle ghelijck daer henen zijn ghericht gheweest, om allerhande middelen te soecken, waer mede sy ulieden mochten brengen onder hare tyrannije, die veel wreeder, ofte ten minsten veel schandelicker ende verachter soude geweest bebben dan die van de Spaegniaerden selve) willen aller anderer menschen van der weerelt verstandt ende sinnen nae de mate hares eyghenen verstants meren, ende ghedencken dat een yeghelick sal terstont voor quaet aensien t'ghene dat sy sulcx achten te wesen: maer wanneer het al t'samen in een ghemeyne waghe wel sal gheweghen werden, soo sullense bevinden hoe datse hen grootelicks misrekent hebben. Want den ghenen diense achten niet weerdich te zijn dat hy leve, om dat hy de welvaert van de ghemeyne sake is vervorderende (dewijle dat de ghemeyne welvaert niet anders en is dan des volcx oft der ghemeynten welvaert) den selven sullense door hare eygen dwaesheyt noch tot meerder eere brenghen, door dien dat
