[ 232 ]
het volck altijt meer houden sal van den ghenen die 't beschermt ende voorstaet, dan van dien die 't wil onderdrucken. Maer boven al connen wy ons niet genoech verwonderen, hoe datse in desen Ban hebben vergheten t'ghene daer soo veel gheringhe ende quaetwillighe schrijvers in hare ongheschickte smaedtschriften ende libellen fameus ons soo menichmael mede belastert ende beloghen hebben, namelick, dat wy den Edeldom souden haten. Maer aen wien souden wy doch desen haet moeten beginnen? En soude het niet wesen aen ons selven, aen onse vrienden ende maghen, die alle (Gode lof) van seer eedele ende hooghe afcomste zijn, jae van soo ouden gheslachte ende so wel met rijckdommen als met allerhande staten ende digniteyten versien: In der voegen dat wy niet seere en zijn besorght, datter onder onse vyanden veele sullen wesen, die met rechten hen selven sullen beter ofte hoogher connen achten dan wy en zijn, ende weynich sal men daer oock vinden die hen souden by ons connen verghelijcken. Boven dien soo can de ervaringhe t'selve ghenoechuitwijsen, of wy niet tot voorderinghe van de Edelen alle t'ghene doen dat ons moghelick is. Maer soo wy van over langhen tijde voorsien heb-
