[ 237 ]
oorsaken van behoudt ofte verderffenisse der selven alderbest bekent, ghy die daer meest te verliesen hebt, ende die by alle rechten ghehouden ende verbonden zijt de selve te bewaren, hebt al veel anders hier van gheoordeelt. Men heeft alle t'volck van den lande daer op hem laten beraden, ende zijn ghesintheyt van de voorschreven condizien des vredes ghevraecht: en alle t'volck heest se eendrachtelick verworpen, als zijnde veel te onredelick: d'welck niet in een stadt alleene, maer in allen is ghelijckformichlick geschiet. Wel is waer, dat wy lieden de Keyserl. M. metgaders den Coninck van Vranckrijcke, de Coninginne van Engelant, ende den Coninck van Portegael ootmoedelick hadden gebeden, te willen van ons heden ten besten spreken ende middelen, op dat ons eenen goeden vrede verwilliger mochte werden. Maer wy en gedencken niet, dat eenich verstandich mensche t'selve soude op sulcke wijse willen nemen ofte verstaen, als of wy daer door ons lieden onder het goetduncken ende seggen van de voorsz. Potentaten souden ghestelt ende onderworpen hebben.
Ende aengaende datse segghen dat men soude verboden hebben de publicatie van dien, ofte soo veele ghedaen dat de voor-
