[ 244 ]
sy hadden soo veel brieven hier ende daer weghesonden om den eenen ende den anderen te verleyden, ende soo veelderhande practijcken worden dagelicx voorgheslaghen: Ende siet, alsoo saen als wy ons slechts eens binnen Utrecht comen verthoonen, met hulpe, bystant ende raet van mijne Heeren de gedeputeerde van de provintien, soo sach men allen dien grooten nevel haest vertrecken, ende soo veel casteelen diese noch bewaert hadden, om haer tyrannije daer in te bevestigen, worden afgeworpen, ende soo veel steden versekert, alsoo dat hem maer een stadt daer wat aen ghelegen is, alleenelick is overgebleven, daer in hem t'hooft van den voorschreven aenslach was houdende: de welcke hy selve noch al niet en conde nae zijner handt gekeeren, sonder eerst die afgrijselicke moort te doen van den genen dien hy zijnen vader was noemende, die des avonts daer te vooren by hem aen zijn tasel hadde geseten, hebbende hem vriendelick ontfanghen ghelijck Judas dede met eenen valschen kus. Dit is, mijne Heeren, t'ghene daerom datse soo luyde crijschen. Dit is die Helena, om de welcke datse zijn strijdende.
Ende van datse ons voorts oplegghen, dat wy alle gheestelicke persoonen verjaecht
