[ 249 ]
en can, ende tusschen dit wantrouwen, als men op de woorden eens menschen die een valsch logenaer ende bedrieger is, ende die geen trouwe noch geloove en houdt, hem niet en wil versekeren ofte betrouwen: insonderheyt voor ooghen hebbende de schoone exempelen van de arme Mooren van Granaden die genoech van dese beloften souden weten te spreken: ende de doodt van de Heeren Graven van Egmondt ende Hoorne soude sulcx oock genoechsaem bewijsen. Maer hadden dese goede Docteurs in de Theologie (als namelick de Cardinael die een van de fondamenten ende pilasen is van de Roomsche Kercke) de rechte ende voorneemste oorsake van Judas ende Cains val wel ondersocht, sy souden ghevonden hebben dat het was de wanhope: waer toe wy door Gods ghenade niet en zijn gecomen, noch oyt comen werden. Maer ter contrarien, die wat naerder wil insien ende letten op de grouwelicke ende wreede maniere van spreken, daer mede sy, in dese barbarische, ende argher, dan Turcksche verbanninghe teghen ons blixemen: en sal hy niet lichtelick sien hoe dat sy selve de ghene zijn die spreken als wanhopende menschen, ende die tot de uiterste desperatie van hare saken zijn gecomen, gelijckerwijs
