[ 250 ]
die van den Poeten als rasende ende onsinnighe luyden in haren spelen oft Tragedien werden ingevoert? So zijn dan sy selve de ghene die hare conscientie met een brandt-ijser gheteeckent als Judas, verbaest als Cain, ende van God verworpen als Saul, hebben. Doch niet te min, mijne Heeren, wilt alhier de groote voorsichticheyt van dese wijse hoofden aenschouwen. Sy segghen, dat de dissidentie allen boosen menschen ghemeyne is. Wy willen met dy nu wat spreken, Cardinael, die soo veel tijts in den Scholen verloren hebst, ten zy dat du sulcx maer leeren en heeft, te zijn wat van jońcx op tot lieghen ende bedriegen onderwesen. Soo vraghe ik dy dan, wat saltstu antwoorden op 't seggen van dien voortreffelicken ende wijsen Orateur, die sijn vaderlant so lief hadde (also wy in onser Joncheyt van gheleerde luyden gehoort hebben) daer hy spreect, dat de meeste stercktes die een vry volc can hebben tegen eenen tyran, is de dissidentie ofte mistrouwen? Ende dit propoost wert aen eenen anderen Philips geaddresseert, die niet dan een cleyn Scholier en was in de schole van tyrannije, by dat dijnen Don Philips is, die alle tyrainnens verre te boven gaet, ende om den welcken te straffen ende te beschuldigen, gheene van
