[ 256 ]
nietende, als als van dat men ons benomen heeft) erghens in Duytschlandt toe te voeghen, ende ons van alle onse schulden die in seer grooten ghetale zijn te ontlasten, ende noch daer en boven te geven thien mael hondert duysent guldens in gereeden gelde ende gantsch goede versekeringhe. Dit sijn sonder twijfel schoone presentatien, mijne Heeren, ende het en heeft so veele niet gecost haer bladt te doen omkeeren de gene die van ons zijn afgheweken ende tot de vyanden vertrocken. Maer so verre is het van daer, dat men ons sodanige conditien soude gepresenteert hebben, dat ter contrarien men noyt en heeft so veele aen ons connen ghewinnen, noch om brieven die de Keyserlicke Ghesante aen ons schreef noch met heymelicke practijcken, daer mede sy ghedochten sommighe van onse dienaers aen te varen, ende oock sommige van onse namaeschap te wercke te stellen, noch om brieven van de Commissarisen selve, te weten, dat wy souden eenighe besondere artijckelen ende in onsen name overseynden. Maer wy hebben gestadichlick geantwoort, soo verre alsse den vreden souden veraccorderen op sulcke conditien, als ghy lieden, mijne Heeren, doe ter tijt aen hen waert versoeckende, dat wy ons daer mede hielden
