[ 257 ]
voor voldaen, niet begeerende ander conditie t'zy goede os quade, te genieten dan even deselve die ghy lieden soudt vercrijgen, ende dat wy ons selven noch recht noch dweers en begeerden van de gemeyne sake af te sonderen: aen de welcke alleene wy achteden dat alle ons geluc ofte ongeluc was hangende. Is het dan niet een seer, wel uitgesochte lasteringe, dat men yemant gaet beschuldigen, dat hy een man met eeren is, getrouwe ende stantvastich, boven dien also wel versekert tegen de winden der beloften, als hy door Godes genade is tegen de groote vloet van dreygementen?
Dus verre, mijne Heeren, hebt ghy verstaen de beschuldinghen, ofte om beter te segghen, het schimpich naspreken, valsche aenclachten ende lasteringhen die sy teghen onse eere, metgaders teghen onsen goede name ende fame by een hebben vergadert. Daerom soo willen wy ulieden (in de welcke: aleene wy ons bekennen gehouden te zijn, belanghende onse goede, metgaders de gestaltenisse der selven, ende insonderheyt onse gedanen eedt) laten nu de richters hier van wesen, ende na uwe beliefte het vonnis spreken: niet weygerende ten rechten ghestraft te werden, ist by al dien dat men ons sal bevinden aen't ghene datse voorghe-
