[ 266 ]
dienaers zijne gerechtige wraecke ende toorn noch laten vallen, metgaders door zijne groote goetheyt, onse onschuldt ende eere, so wel binnen onsen leven als by de nacomelingen, hanthaven ende onderhouden. Belangende ons lijf ende goet, wy hebben de selve al over langen tijdt tot zijnen dienste toegheeyghent: met den welcken hem sal believen te doen nae zijn welbehaghen, tot zijns naems eere ende tot onser salicheyt.
Ende gemerckt dat de goten van dese eerloose ende schandelicke verbanninge so, aerdich geleyt zijn mijne Heeren, datse ooc, over uwe hoofden hen comen uitstorten, so ist dat ghy van dies wegen niet alleene u geensins en hebt te ontstellen, dat ghy ter contrarien veel meer behoorde te gedencken, dat de Spaegniaert ende zijn aenhangers volgen hier in de aengeboren maniere,van doen ende aert van de vrouwen, de welcke na datse wel gehuylt, gebeten ende gecrabt hebben, eyndelick ende voor haer leste remedie tot de spijtighe ende quade woorden plegen te comen. Also doet nu oock uwe vyant, die u coemt voor de leste reysen aenbassen: ende connen wy sleches, soo veele gedoen, dat wy hem onse stantvasticheyt, resolutie ende goet herte bethoonen, wy sullen hem haeste ten eynde van
