[ 271 ]
Religie. Wy en willen hier niet disputeren, mijne Heeren, welcke de warachtige Religie is, daer in Godt warachtelic ende na zijnen woorden gedient ende aengeroepen wert, latende sulcx doen de gene die in desen beter geoffent zijn dan wy: insonderheyt, nademael dat een yegelic aen de professie die wy van de selve doen, genoech bekennen mach van wat meyninge ofte gesintheyt dat wy zijn. Maer wy willen ulieden wel vry waerschouwen, dat den staet ende de gelegentheyt des lants sulcx is, dat sonder d'exercitie van de selve t'landt gheen dry daghen en can bestaen. Ghy siet hoe wonderlick dat het getal is vermeerdert, ende dat den haet tegen den Paus in de herten van de inwoonders des lants, al te diepe ingewortelt is, door dien dat zijn schadelicke practijcken teghen den staet van dese landen soo claerlick ontdeckt zijn. Wie sal hem dan connen beroemen het lant lief te hebben, ende niet te min soodanigen raedt geven, dat men soo groot een getal van volcke uit den selve soude verjaghen, het welcke daer uit vertreckende, sal dat gantsche landt woest, arm ende ellendich laten, jae sal daer en teghen de vreemde landen met volck ende goet gaen verrijcken? Ende of sy nu niet en wouden vertrecken,
