[ 272 ]
wie sal se bedwingen sulcks te doen? Laet ons de ooghen op onse nabueren slaen, metgaders ons eygen exempel wel overmercken; ende soo wy niet gantsch rasende ende ontsinnich en zijn, wy sullen ons wel wachten van soo schadelicken raedt te volghen, die den gantschen staet deser landen soude dat onder dat boven keeren, ende in den grondt bederven. Maer dat meer is al ist sake dat onder de gene die de Roomsche kercke volgen ende aenhangen, veel luyden van eeren ende liefhebbers des vaderlants zijn, metgaders die hen eerlick ende loffelick in haer devoyr ghequeten hebben. Soo is men nochtans versekert van de ghene die de Religie zijn toeghedaen, dat men onder hen niet eenen en sal vinden die met den vyant eenich verstant ofte practijcke heeft; maer alle gelijc zijn hem eendractelick tegen vallende. Ende hoe wel datter sommige zijn gevonden worden, die de brootdroncke ende moetwillige kinders slachtende, hebben ons door hare onvoorsichticheyt oock binnens huys te doen ghemaeckt: soo en hebben sy daerom nochtans metten vyant gheen verstant ghehadt.
Dewijle dan dat ghy nu haer voornemen weet, mijne Heeren, soo en ghebreeckt daer nu niet anders, dan dat met bequeme mid-
