[ 276 ]
ende met so veel arme weduwen ende wesen. Laet ulieden aengheleghen zijn dat soo veel moorden ende bloetstortinghe in't binnenste ende in 't herte van den lande gheschiet zijn, so veel kercken, verdestrueert, so veel herders met hare arme schaepkens gaen dolende achter lande. Stelt ulieden voor oogen die wreede ende barbarische executie tot Nivelle by den Grave van Mansfelt gedaen. Welcke dinghen alle, ghy lieden seer wel cont ontgaen, ende allen den overlast van dese oorloghen op des vyandes hals werpen, soo ghy alleene de partijschap van ulieden weert, ende alle uwe middelen te samen met eendrachtigher herte ende moet ghebruyckt ende aenleght, sonder te willen sparen niet t'ghene dat in den grond van uwe beursen steeckt, maer alleene wat daer overschiet.
Ende so veele als ons in 't besondere is raeckende, ghy siet, mijne Heeren, dat het al meest is om dit hooft te doen, ende dat is t'gene datse voor alle dinghen soecken, hebbende t'selve om soo hooghen prijs ende om soo groot een somme gheldts tot der doot beschickt ende toeghevoecht: endę segghen daer en boven, dat soo lange als wy onder ulieden sullen wesen, dat dese oorloge gheen eynde en sal nemen. Maer oft
