[ 277 ]
doch Godes wille ware, mijne Heeren, dat een van beyden, ofte ons eeuwich ballinckschap, ofte oock onse doot, ulieden mochte een oprechte verlossinge van soo veel quaets ende ellendicheyt mede brengen, als wy sien, dat de ghene die wy hier te vooren so menichmael haer bedencken ende meyninge mede hebben in den raedt gehoort seggen, ja besonderlick ende alleene van den saken spreken, ende die wy so wel van binnen als van buyten kennen, zijn ulieden toe bereydende: hoe aengenamen soude ons soodanigen Ban zijn, ende hoe geerne souden wy soodanighe doot willen lijden? want wat is de oorsake waerom dat wy alle onse goeden hebben als tot eenen roof ende buyt gestelt? Is het om ons daer mede rijcke te maken? Waerom hebben wy onse eygen broeders verloren, die ons liever waren dan ons leven? Is het gheweest om andere terstont te vinden? Waerom hebben wy soo langen tijdt onsen sorte (na den welcken soo wy een vader willen gheheeten zijn, wy met rechte wel behoorden te verlanghen) in hechtenisse ghelaten? Is het in uwe macht ons eenen anderen te gheven, ofte den selven wederom toe te stellen? Waerom hebben wy ons leven so dicwils gewaecht? Wat prijs ofte loon van onse
