Pagina:Nieuwe Tijdinghen 1620-04-28 (2).djvu/6

van gheweer dienen tot defensie soude voorsien, op dat sylieden, soo haest als d’andere opmaninge gheschiet stracx souden veerdich wesen, mits datmen wel weet dat den Turck eenen aenslach op de Berch-Steden heeft, ende de selve onversiens meynt te overvallen, men heeft oock sekere tijdinghen dat den Teurckschen Keyser is vertrocken van Constantinopelen, ende dat onder t’Pretext, van in Polen te willen vallen, ghelijcker oock openbaer oorloge teghens Polen is ghepubliceert gheweest, maer men betrouwt hem niet, want men heeft seker schrijven ontfanghen, dat hy tachentich duysent Tartaren na Polen schickt, maer dat hy selve in eygenen persoon met sestich duysent Teurcken naer Hongrijen comt.
Onse Cosacken hebben over eenighe daeghen de sterckte S. Michiels bespronghen, maer sy hebben hen aldaer dapper gheweert, eenighe dootgheslagen ende afghedreven als sy nu met stercker macht quamen, sijn sy (soomen seyt) op sekere conditien ingelaten, maer hebbent strackx al gheplundert, daer naer sijn sy opt scherp ghecomen, grooten moetwil bedreven, ende de gansche merckt uyt gheplundert, hebbende daer naer 50. mans tot Agspach over de Donauw gheseth, Des Heeren Hans Wolff Concins Heerlijckheyt Warching gheplundert, een mevrouwe, Dochterken ende Jonghen Heere wech gevuert,

maer