4
ghehouden voor een van de Alder-vaste Herssenen diet met Calvinus houden heeft zy selven daer oock willen vinden, ende versocht dat hy oock mochte als andere daer gefouriert worden, maer het is hem pladt af gheseyt.
Wt Weenen in Oosten-rijck, den 8. April 1620.
Op den lesten dach Meerte is te Mulhausen eenen Rijcx-dach ghehouden, inden welcken teghenwoordigh gheweest hebben in persoone de Cheur-Vorsten van Mens, Colen ende Sacxen, Item de Gedeputeerde vanden Cheur-Vorst van Triere, vanden Hertoch van Beyeren, ende vande andere Vorsten, alsoo wel vande Catholijcke, als van Luytersche oft Martinisten versocht, ende in desen Rijcx-dagh hebben de Luytersche begheert dat de Catholijcke Cheurvorsten ende andere Vorsten hun souden gheven sekerheyt in gheschrifte, dat de Catholijcke gheen Oorloghe teghen de Luytersche en souden voeren als de Calvinisten verwonnen souden zijn.
Welcke versejeringhe in schrift ghegeven zijnde den Hertoch van Sacxen, ende de andere Luycheranen hebben verclaert dat zy voortaen willen staen voor den Keyser Ferdinandus ende voor de Catholijcken, ende men heeft daedelijck terstont door eenen Ambassaet den Keyser Ferdinandus ghepresenteert hem selven, ende alle zijn macht.
