5
Sondrio, Hooft-plaetse der Valtellina, alwaer sy allen die Inwoonders, soo Catholijcken als Caluinisten hebben in Wapenen ghevonden, mits dat sy hadden verstaen eenich geroep van elders. Ende alsoo sy met luyder stemmen begosten te roepen in het Italiaens (welcke taele aldaer, ende by de Grisons ghemeyn is) Viua la fede Catholica, soo zijnder ontrent twee hondert Caluinisten ghebleuen in die eerste furie ende resistencie. Den Gouuerneur van Sondrio, hoe wel hy niet Catholijc en was, nochtans en is hem niet misschiet, noch ooc aen vele andere van de selue ghesintheyt.
Daechs daer nae, eenighe van dese Ridders, met eenen hoop Soldaten, zijn ghetrocken naer de Valleye van Malengo, ende eenighe andere zijn ghetrocken naer het quartier van Barben.
22. Julij, zijnde Woensdach, soo is Ioannes Maria Parauicinus, met de sijne ghecomen wt de Stadt Como, naer den mont van de Reuire Adda, daer die valt int Meyr van Como, ende heeft inghenomen, ende besedt allen de Trincheen aldaer gemaeckt.
23. Julij, ghevanghen zijnde den Doctoor Hercules Salice, Hooft van allen die Ketters ende Caluinisten in Valtellina, soo hebben sy hem het leuen gheschoncken, hoe wel dat hy nademael door ander ongheluck is om ghebrocht.
Op den seluen dach is Parauicinus met de sijne ghecomen binnen Morbegno, Traona, Caſpano, Mantello, ende Dubino, al waer vele Caluinisten zijn doot ghebleven.
24. Julij is in Valtellina gearriveert een vroom Capiteyn ghenaemt Chriſtophorus Carcano, den welcken met zijn volc heeft afgheworpen allen die brugghen, ende inghenomen allen die weghen oft passagien treckende naer de Landen der Grisons ende der Venetianen.
Alle dese dinghen alsoo ghepasseert zijnde, soo zijn allen de Ghemeenten des Valtellina by een ghecomen, ende hebben voor Gouuerneur Generael des Landts ghecosen den voorseyden Ridder Iacobum Robuſtelli, ende hebben al te samen hem eedt ghedaen van ghetrouwicheyt, ende dat sy sullen goet
