7
onder het ghebiet van Vlyſſes Salice, Sone van Hercules, geuallen in Morbegno ende Traona. Maer Azo Beſta, met een veel Waelen ende andere Soldaten, isser op geuallen, mede heefter vele doot gheslaghen.
5. Augusti, zijn ontrent dry oft vier duysent Grisons wt het quartier van Chiauenna, gheuallen in Valtellina: maer zijn corts daer naer vromelijck wt gheiaecht door de Catholijcken.
13. Augusti, waren in alles ghecomen in Valtellina, ontrent ses oft seuen duysent Voluntaire Soldaeten Voetknechten, ende ontrent seuen hondert Ruyters oft Quirassiers, om te dienen aen de Catholijcken Valtellinoisen, ende waren allenskens in ghecomen, ende noch daghelijcx wassende.
Onder andere, zijnder ghecomen vele principaele Edelmans, als Graef Ian Serbonello van Milanen, ende meer andere Lief-hebbers, Heeren ende Graeuen.
Alsoo de Caluinisten hadden verlaten Nouato, soo hebben die Catholijcken de selue passagie inghenomen. Hebben ooc den 15. Augusti inghenomen die passagie van Saſſo Corbe ende van Chiauenna: ende hebben allen die Caluinisten laten loopen hunlieden als vyanden maeckende een een brugghe van gout: naer het ghemeyn spreeckwoort.
15. Augusti, soo heeft Ioannes Antonius Butintrico, Capiteyn van Plurs, versoght aen den Gouuerneur van Milaenen, dat hy die ghemeente van Chiauenna, ende Plurs soude willen nemen onder die protectie van den Coninck van Spagnien, om den grooten noodt daer sy in waren.
Ter wijlen dese dinghen gheschieden in Valtellina, soo en hebben Rudolfus Pianta, Ioannes molina, ende andere Ridders wt ghebannen ende quaelijck ghetracteert zijnde door die van de factie van Salice, ende andere Caluinische Grisons, niet gheslapen. Want Pianta comende van Tirol, heeft inghenomen die valleye van Monasterio, ende noch een andere daer by ligghende, ghenaempt Agnedina. Een ander
