3
_vignet.jpg)
DVysent ses hondert iaer, en twintich daer beneuen
Soo wort int openbaer een wonder hier beschreuen
Een wonderlijcke saeck, soo ick v sal vertellen,
Daerom stelt wacht en waeck, vyanden Godts rebellen.
Een man seer wijt vermaert, te Amsterdam woonachtich
Hy heeft veel schadt vergaert, daerom is hy seer prachtich
Den Paeu soo is zijnen naem, wilt hier nv al nae hooren
Van hem is groote faem, zijn eer gaet nu verloren
Daer is een groot ghetal, van valsche Munt bevonden
Men weetse noch niet al, hoort wel nae mijn vermonden
Men gheeft nu veel die schult, men hoort van veel nu segghen
Maer met een groot tumult, gaetmen den Paeu op legghen.
Den Paeu is nu verveert, hy hoort die honden baffen
Hy heeft van Godt begheert, dat hy hem wilde straffen
En riep daer ouer luydt, ghy mannen van verstant
Laet Godt nu drooghen wt, den groenen boom playsant
Is’t dat ick in dit stuck, het minste heb ghedaen
Dat dan met ongheluck, den boom nu moet vergaen
