5
Den menschen doet gheen quaet, hy wort daer toe ghedreven
Is’t dat hy vals gelt slaet, hy mach het wel wt gheven
Is’t dat hy gheen quaet doet, waerom gaen zy twee dooden,
Ghy zijt die saeck niet vroet, het wort daer soo ghebooden
Het wort op twee gheleyt, die moesten dit besueren
Daer wort van veel gheseyt, die mochten noch wel treuren
Die ander die zijn Heer, dit waeren maer haer knechten
Die ginghen op en neer, om t’stuck wel wt te rechten
Zy ginghen altoos sien, om t’werck wel te bemercken
Maer dese twee allien, die moesten altijdt wercken
Het stuck komt aen den dach, in alle Heere Landen
Zy soecken nu o wach, bedecken haere schanden
Zy zijn te raet ghegaen, om t’best te moghen kiesen
Om vast te blijven staen, haer eer niet te verliesen
Zy slooten in haer raet, al met een groot verlanghen
En hebben metter daet, die twee terstont ghevanghen
Als zy nu saten vast, en oock seer wel bewaert
Daer waeren zy belast, en grootelijck beswaert
Mannen ’tis v werck, al ist voor ons ghedaen
Ghy moet nu in een perck, die doodt daerom bestaen
Men sal v nu seer ras, doen rechten met het sweert
Daerom weest op dit pas, in gheen manier verveert
Den Beul en sal gheen hant, aen v lijf moghen steken
Daerom blijft nu constant, gheen eer sal v ghebreken
Al in die ouwe kerck, daer sal v graf plaets zijn
Hout v nu vroom en sterck, ghy zijt haest wt die pijn
