4
Een Pattacon int Legher ghenoempt, dat is een stuck van 8. Schellinghen, doet hier 3. Gulden en 12. Stuyvers in Pfalts Lant, ende en wort de Soldaten niet hoogher ghegheven in betalinghe van haer Gagie als 2. Gulden 8. stuyvers, ende de Marquis Soldaten worden allen maenden betaelt.
Den Marquis Spinola, ende der Ghevnieerde Vorsten Legher hebben den 23. Octobris quartier ghemaeckt voor de Soldaten, om de Ghevangenen van d’eene zijde ende d’andere teghen malcanderen te moghen lossen.
1620. den 3. Nouember wt Legher van den Marquis Spinola by Creutſenach int Boſch.
DEn 26. October trock onsen Leger tot Scadeck by een vlecke ghenaempt Esseren, den Marquis dedet af branden, om datse dertich Ruyters hadden doot ghesmeten, met een Quartier Meester.
Den 26 quam ons secours by ons van Don Loys by een Dorp ghenaempt Vorsedum, fraey volc oock Italianen, het Regiment van Duc D’Arschot, ende Duc de Borneville.
Teghen den auont quamen wy in een cleyn stedeken, daer logheerden wy dien nacht.
Den 27. October trocken de Boots-ghesellen op
