4
ende hebben haere afscheyt ghenomen, ende zijn nae Slesien ghetrocken om haere betaelinghe te halen, waer ouer den Generael met zijn resterende Volck, ende twee stucken Gheschuts wederom te rugge na Gorlits is ghecomen.
Den 23. des sauons is t’volc van zijn Ceurvorstelijcke Ghenade den Hertoch van Saxen met een Regiment, ende duysent Musquettiers, met seven Cornetten Ruyters, ende eenighe stucken Gheschuts op ghetrocken, ende is den 24. ditto smorghens vroech voor Gradiz een sterck Edelmans Huys oft Casteel ghecomen, ligghende op een passagie, ende is op den Middach daer voor ghecomen, heeft terstondt het selvighe sterck met Gheschut doen beschieten, waer ouer die van binnen hebben moeten parlamenteren, soo datse t’selve ouer ghegheven hebben, ende zijnder af ghetrocken sonder gheweer oft yet anders, ende waren onder de hondert Musquettiers.
Naer de veroveringhe van desen ende t’selve wel besedt was van den Hertoch van Saxens volc, zijnse getrocken voor de Sterckte Barut, de welcke hun van ghelijcken oock hebben over ghegheuen, ende zijn veraccordeert, als dat de in ligghende Soldaten in de plaetse wesende zijn wt ghetrocken met sack, ende Pack, ende brandende Lonten, ende daer waren 1000. Musquettiers, ende 500 te peerde tot Wittingauw ghecomen.
