13
ende daerenboven noch 12. 15. in 18. maenden Solts ten achteren zijn, waer van zy niet eenen helder en hebben te verwachten, en doen anders niet dan lamenteren, ende seer vreeselijcken vloecken, ende sweren, ende vervloecken haeren nieuwen Coninck.
Alsoo dat al waert saecke dat den Winter-Coninc oft eenighe wederspannighe noch yet wilden voornemen, en souden gheen volck kunnen bekomen om hun te dienen.
Dat op gheboden Boheemsche Landt-volck, de welcke inde 8000. gheweest zijn, hebben hun oock stracx beneffens de Hongheren ende Moraviers geretireert ghehadt, ende wt het Hof ghemaeckt, Ende de Boheemsche Armade is t’samen met het Landtvolck sterck gheweest in alles 36000. mannen, Daer teghen was de Keyserlijcke Armada, met het by gevoechde Landt-volck 60000. mannen sterck.
Van allen de Namen van onser zijden van de dooden kanmen noch niet alles weten, oft allen de namen vande ghevanghenen van den vyant, de welcke groot int ghetal zijn, men verstaet hier binnen Prage dat van onser zijden souden bleven zijn den Baron de Petersen, met Monsieur de Dompre, ende den Baron Dauchy in zijnen bil gequetst zijn, met noch een andere Heere die aen den mont soude ghequetst zijn.
