6
Den Hertoch van Beyeren, ende den Grave van Bucquoy, ordonneerden eenen Generalen Slachte doen, waer ouer den Hertoch van Beyeren, met den Valeureusen Bucquoy, in Godes, ende allen Heylighen (daer van die Octave is gheweest) namen, zijn voorts ghevaren, ende Godt den Heere heeft haer de Victorie verleent, ende hebben alsoo met groote Furie van twee sijden op de bohemen ghedronghen, met sulcken ghedruys, gheweldt, ende schieten dat scheen dat de Wereldt soude vergaen, soo dat t’Aertrijck dommelde, ende hebben de Hungeren de welcke inde 9000. sterck geweest zijn, strackx inde vlucht ghedreuen, ende zijn met hunnen roof die zy by hun hadden, in groote disordre wech gheloopen, jaer datse haer eyghen volck vande Infanterie om verre liepen ende de Slach-oorden braken.
Daer naer is het Thurnische Regiment (waer ouer den Jonghen Graef commandeerde) beneffens 1000. peerden onder den Oversten Zubna aen gecomen, wesende vande Boheemsche, dewelcke noch wilden tegenstant doen, die hun seer dapperlijck ende Ridderlijck gheweert hebben, maar ten mocht haer niet helpen, want zy soo subitelijcken ende fellijcken zijn aenrendt, eer zy te deghe in haere Ordre waeren, en zijnder ouer 50. te voet, ende 200. peerden niet af ontkomen van de boheemsche.
