5
gerenoncieert Solemniter, waer af datse Reuerſen onder haren Seghelen overghegheven hebben, hebben sulcx alles ghedaen die daer waeren in grooter menichte, daer waren vande Staten, Heeren, Ridders, ende Edellieden, met noch ander Heeren, ende moesten daer ouer leveren allen de Geschriften, Originalia van Confœderationes, oft Verbintenissen die zy met eenighe andere volcken, Potentaten oft Gheallieerde hebben gemaeckt, oft mede in haer verbont waren, oft aen malcanderen ghesworen hadden, ende haere beginselen van Gheschriften, Contracten, Sedullen, die zy oyt opt ghemaeckt hebben met yemanden.
Dit wert ghedaen in Præſentia Ducis, Comitis de Liechtenſtain, ende den Grave van Bucquoy met andere Heeren, zy moesten oock ouerleveren die Croone, ende Cleynodien daer toe behoorende, soo die in die oude stadt ghevlucht waren, ende brengense op zijne behoorlijcke plaetse, als in Sinte Wencelaus Cappelle, aldaer sy wert ghelevert.
De Gherebelleerde stonden soo slecht op malcanderen en saghen, oftse niet een gecost en hadden, hoe dat noch voorder vergaen sal, wiltmen met der tijdt vernemen.
