3
telen ghebrocht. Den vlucht ouer de brugge van Praghe was soo gheweldich datter veel vande Rebellen oock versmacht zijn De Stadt Praegh is met seuen duysent Soldaten besedt, de reste zijn besich om de ouerghebleuene Rebellen ende Beemsche Soldaeten den dans te leeren, dier zy veel duysenden in den slach hebben doen springhen. De Calvinische steeckent al op de Enghelsche ende Hungaren, ende claeghen dat zy de Oostrijckerse ende Morauiersche Soldaten hebben inde slaghen ghelaten.
De Hungheren verlaten ten lesten den Bethelem Gabor ende soecken de vlucht. Hy heeft nauwelijckx twee duysent met sich. Ende dat oock eensdeels om dat den Turck Vaiuam een stadt van Hongarijen meynden te ouerrumpelen, maer Godt lof heeft sonder yet wt te richten moeten wederkeeren.
VVt Ments 21. Nouember.
Spinola gaet al voorts ende hout niet op in te nemen, hem resten noch dry plaetsen van eenige weerde met de welcke hy niet veel swaricheydts en soude hebben, ten waere den Winter beletten, dese zijn: Nieustadt, Keysers Louter, ende Heydelberga, en Franckendael.
VVt VVeenen van den 18. Nouember met de brieuen alhier ghesonden, vvt Praghe den 9. ende 10. Nouember, hoe den slach verghaen is.
