5
Turcken ende Taerteren seer gheslaghen souden wesen, dat de Taerteren groote schaede int Lant gedaen hebben, Waeromme tot Warschou eenen Lantdach ghehouden wordt om tegens den Somer met eenen grooten Legher te velde te comen.
Eergisteren is Heer Carel van Zarotin als eenen Ambassadeur wt Morauien alhier ghearriveert om van eenen Vrede te tracteren.
Die van Greitzensteyn houdent noch al teghen ende den Grave van Bucquoy is alreets met zijnen Legher op de Frontieren van Moravien, ofte zy nv sullen teghenstaen oft in Ghenade ouer geven, verwachten te vernemen.
De reyse van haere Keyserlijcke Majesteydt op Salsbourch was teghens morghen bestelt, ende zijne Ruyterije ende Guardy waeren al vertrocken, maer zijn wederomme te rugghe ontboden, dan soomen seyt souden den Hertoghe van Beyeren ende Neuborch, als toekomende Gouuerneurs van Bohemen alhier komen, ofte de Keyserlijcke reyse sal de naeste weecke voortganck hebben.
Tydinghe wt Lausnitz in December, 1620.
Sijne Ceur-Vorstelijcke Ghenade sullen dagelijcx vertrecken van Dresden naer Pautsen, om aldaer te dachvaerden den Marckgrave van Jaegherendorp.
